Phili 2 | NAS | STEP | Ee aing, ning dotumari oꞌnong diiꞌ aing aaꞌning otoꞌderurimaung-koo: tee domang kuaaꞌanta Karistooꞌ ninka narung deentarira nkaveruꞌnung, eeꞌnoko napoꞌ tee bakaang piaae dunsirunsi~anta-koong, eeꞌnoko tee bakaang Tanuaang-koo kuunge navunavu, eeꞌnoko napoꞌ diiꞌka pankaruntoong-eta piaareeri otorimaung-koo;

Philippians 2

Tampaꞌ Pakumeeri Daangamariaꞌ Oꞌnoriai

1 Ee aing, ning dotumari oꞌnong diiꞌ aing aaꞌning otoꞌderurimaung-koo: tee domang kuaaꞌanta Karistooꞌ ninka narung deentarira nkaveruꞌnung, eeꞌnoko napoꞌ tee bakaang piaae dunsirunsi~anta-koong, eeꞌnoko tee bakaang Tanuaang-koo kuunge navunavu, eeꞌnoko napoꞌ diiꞌka pankaruntoong-eta piaareeri otorimaung-koo; 2 makosi, diiꞌke nkaang doturotu dupe-antaveriaing narung noruꞌkoo otori, nariꞌ piaareeri, napoꞌ nariꞌ onourariri kapooꞌnanka nariꞌ nkoverima. 3 Deikooꞌnaꞌ eeꞌnoko baka daanganaꞌ nkorariaukaꞌ, teka diiꞌka boonko noruꞌdariri deto pankaing-antareerimatoai. 4 Diiꞌ narunaꞌ narunaꞌ mintoontarima niiꞌning nariꞌ paku-koo mintoontariaing diiꞌka diiꞌ naing noruꞌdariaꞌ.

Tee Karistooꞌ Boonko Noruꞌari Otoko Kumponinge iꞌampuuꞌnaꞌ

5 Diikaang aarumo teeꞌ nariꞌ Jiisuuꞌ Karistooꞌ bakaang-pinaꞌ noruꞌdariri otorimaatoai. 6 Bane Kumponing-pinaꞌ nariꞌ oroꞌke, teka baka etuaravaꞌ Kumponing-pinaꞌ nariꞌ basi otooꞌnaang. 7 Baka naning tamunsiꞌnung deeng-antavaruꞌ, tee naning botovotonaaꞌpinaꞌ otoꞌantavarara. 8 Eeꞌnoko bakei naning-pinaꞌ masikaꞌ oroꞌparuꞌnooꞌketa baka boonko noruꞌari Kumponing meumpuitaaꞌ booꞌkoo tauraꞌparuꞌ, bane aaꞌbarataꞌkoo orooꞌke booꞌkoo. 9 Teeꞌkoo Kumponinge kansiꞌketa deto aꞌdeiꞌ ookara-koo dau iꞌampura teka tee miring pankaing deto basi ookara-koo mirinanka-koo avuuꞌ. 10 Eeꞌnoko ookara nantoong aaꞌnoko paning-koo-nupoong eeꞌnoko kansiꞌkoo-nupoong, napoꞌ kansiꞌkoo boong-nameng-nupoong, teing tee-koo Jiisuuꞌ bakaang miring-koo kinkinaavaing. 11 Eeꞌnoko napoꞌ teinge ookarai Jiisuuꞌ Karistooꞌ tee Ovoring sirakuraꞌ tampaavaing, Bauma Kumponing meenasi oko-antavai.

Aaꞌnaꞌ Arakamariainaꞌ Mutaananooꞌke

12 Teeꞌkoo, ee mmaikoriꞌ, teeꞌ nariꞌ ookara batei-koo Karistooꞌ bakaang kara meumperikoꞌnaꞌ enang napoꞌ teeꞌ nariꞌ meumperimaatoainge, tenang ning diiꞌankoi oꞌnoko naroꞌ deeaꞌ, teka baruꞌnooꞌ tenang ning diiꞌankoi oꞌnoaruko teeꞌ nkorariaing, monkeenaꞌdariri tee diikaang domanturiaing tampaꞌ dupe-antasiiriainaꞌ arooꞌeri mintoontarima. 13 Aiꞌ tee diiꞌkoo mintoompari otomaung tee Kumponing, diiꞌ paku-antaruri tee arooꞌerira bakaang pia siomperiiꞌnaang.

14 Ookara kapooꞌnanka nkoverima minkuminkunanka niiꞌnooꞌ tataꞌdeerima nkoveriaukaꞌ tuumpiropanuka otoriainaꞌ eeꞌnoko kiiroraaꞌnuka, Kumponing baurukaaꞌ kararopanuka anke kansiꞌkoo orooꞌke koompariaꞌnavitu ninka otorimaing. 15 Teing-koo eeꞌning-koo meuꞌke arakarariri otoriaing beentoꞌnanka paning-kooning-pinaꞌ tee kara domantooꞌ deto komperi ookarai ooaavainaꞌ. 16 Teeꞌ nkoveriko diiꞌkoo aaꞌnaꞌ dotumaravaing Karistooꞌ poainaꞌmung eeꞌ noruꞌama: diiꞌkoo amari mintoomarakotaaꞌ tamung poreꞌmoaruuꞌnung. 17 Diikaang baito tee boontunang tampara makosi Kumponing-koo, eeꞌnoko ning dupisiꞌmaavaing deekoꞌ nkaang ereng tee-koo boontunang-koo dau dakoaravainang ning tee dotumaravaing diiꞌ ninka nariꞌ dotumariainaꞌ noruꞌansitaaꞌ. 18 Eeꞌnoko napoꞌ diiꞌ teinge niꞌninka nariꞌ doturariaining.

Paulaꞌke Timoti Naanka Epaparodaitas Botovuretuꞌnaꞌ

19 Ovoringe Jiisuuꞌke tauraꞌpuko tee Timoti diiꞌ Pilipai-nupoong-anko namuꞌke botoamaꞌnaang, ning-koo dooreruriko doturariiꞌnaang eeꞌnoko toroarako diikaang doorenang taaravamira dotumaravainaꞌ nariꞌ. 20 Niiꞌnung naning noruꞌampaꞌ Timoti-pinaꞌ mantong, napoꞌ diiꞌkoo onou aaꞌnaꞌ otoing. 21 Niiꞌning nantoong teing kapooꞌnanka biikaning naing tanata-koo otoromaing, Karistooꞌ bakaning sipai. 22 Teka diiꞌke Timoti bakaang aarumo tampaꞌ noruꞌeri otoring tee teing pinaꞌ deeaꞌ, aiꞌ naninge bauma pakuvumaatopeuꞌnaꞌ nariꞌ teie ning aaꞌnaꞌ pakumumaung tee doorenang tampaara bereng-anta-koo. 23 Enang tee diiꞌanko namuꞌke botoamaꞌnaang piamomaang, tokoonaꞌ ning oꞌnoainaꞌ baakeenemarara. 24 Eeꞌnoko ning teeꞌke Ovoring-koo arooꞌmari aaꞌpamaang, “Ning daꞌdeng simpiriꞌantamaako diiꞌanko damaꞌke mooꞌnaang.”

25 Teka ioꞌ tutung tee Epaparodaitas diiꞌanko napoꞌ botoamaꞌnaang tee ninge mmaikoꞌ, nariꞌ mintoomaremaung eeꞌnoko nariꞌ niꞌninka neeꞌ piatoorora~ baito-koo kuunge. Teenooꞌ tee diikaang naning, kapooꞌkoo ning apukaꞌmaramaing-koo pakumuuꞌnaang botoveruꞌnung. 26 Eeꞌnoko tee diiꞌ aaꞌnaꞌ oo-koo piavoi otong. Aiꞌ tee tee enang mankiꞌantavari otong siipavouꞌnaꞌ taaraverira miꞌmiinkiꞌdoriko noruꞌdurima. 27 Eeꞌ, masikaꞌ, tee tee dapiꞌ booꞌparuꞌnung, teka tee Kumponinge piaavura domang-antavuuꞌnung. Teka tee narung deeaꞌ, tee aaꞌnoko ning piaamura Epaparodaitas domampuuꞌ, orarunsi ning-koo pauꞌeereꞌneeng-koo. 28 Teeꞌkoo dau basinaꞌ diiꞌanko boto-koo piamoi oꞌnong diiꞌke napoꞌ ooverira doturoturariainaꞌ, eeꞌnoko nkaang orarunsi birimpuai. 29 Emuꞌ tee teꞌ diiꞌanko basiarako bakei aaꞌnaꞌ onkeonkeꞌeriaing Ovoring bakaang miring-koo aaꞌnaꞌ doturariri. Eeꞌnoko nantoong tee-pinaꞌ oroꞌnuka pankaing-antaverererimaatoai. 30 Aiꞌ tee tee dapiꞌ booꞌparuꞌnung tee-koo Karistooꞌ bakaang-koo nko-nko-koo kuunge; booꞌkoo tauraꞌparuꞌ ning pakumuma diiꞌ isipoꞌ otori makosiriaruko.